Ekainak 22-23: Piriniotako irteera

BELAGUA – HIRU ERREGEEN MAHAIA – LINZA

Gazteak gineneko oroitzapenak datozkigu mendi honetara igotzean. Garai hartan, Piriniotara, ez ginen gaur egun bezain sarri joaten. Bidaia bera ere, luzeagoa zen; denbora gehiago behar izaten zen Erronkaribarrera iristeko.

Beraz, Euskal mendizaletasunaren klasiko hau igoko dugu, eguraldiak eta egun bertako baldintzek uzten badigute.

Diotenez, Hiru Erregeen Mahaian, bat egiten zuten hiru erreinuek: Nafarroakoak, Aragoikoak eta Biarnokoak. Tontorrean elkartzen ziren beraien arazoez eztabaidatzeko hiru erregeak, inor bere lurretatik irten gabe. Baina hau guztia, kondaira bat baino ez da. Berezko muga, ekialdera dagoen aurreko tontorrean egiten du. Zapalgune moduko bat egiten du tontorrean eta hortik datorkio izena bera: Mahaia edo Mesa eta Table erderaz.

Kontuak kontu, asteburu osatua eta “kondimentuekin” denontzako egon dadin…

Larunbatean aterako gara Erronkaribar aldera eta busean lo kuluxka bota ondoren, Ezkilzarrako parajean askatuko dugu artaldea. Tipi-tapa, gure pausoak, bertako belardi gozoak zapalduz joango gara. Barneratzen joan ahala, Larrako arraiduran edo Karst-ean murgilduko gara. Lapazarrako magaletik, zeharka aterako gara Larreriako lepora eta bertatik GR12-ren marrei jarraituz, Pakiza Linzolako magaletik, Solanako sakonera eramango gaitu. Belardi eta harkaitz pitzatuetako bazter honetan erabakiko dugu, Linzara jeitsi ala Hiru Erregeen Mahaira igo. Tontorrera igotzeko hautua egiten dutenek, aukera anitz dituzte: Ukerdi, Budogia edo bide arrunta jarraituz. Goiko mahaian, “batzar irekia” egingo da !!

Gailurreko ikusmiraz gozatu ondoren, Solanako ordokira jaitsiko gara eta hemendik bide-zidor goxo eta lehunean, Linzara.

Hiru Errege Track-a

LINZA – ANZOTIELLO LEPOA – OZAKO OIHANA

                Goizeko ihintzarekin batera abiatuko gara Linzako aterpetik. Begi bistan dugun Paso de Caballo aldera igoko gara. Hemendik Foyas de Gamuetako aterpera egingo dugu. Ordoki zabalean, zuzen jarraituz, Paso de Anzotiello aldera egingo dugu harri artean. Hemendik aurrera ez dago zalantzarik bukatu arte; harri artean eta belardi gozo artean Mallos de Ferrerias aldera egingo dugu eta hemen Atxeritoko haranean sartuko gara.

                Hemendik aurrera pistan behera egingo dugu aste bukaerako bizipenak kontatu eta Ozako Oihanera iristeko.

Anzotiello Track-a

Egitaraua eta baldintzak

Zarauzko Beteranoen XVIII. Ibilaldia Deba – Mutriku – Saturraran – Ondarroa

Ibilaldia Deba herrira iristean izen bereko ibaia gurutzatu eta tunela pasatakoan autobusetik jaitsi eta bertatik hasiko dugu ibilaldia.

Santio Bideari jarraituz egingo dugu aurrera Mutrikura iritxi arte.

Hemendik, aurrera jarraituko dugu Galdona Mendia deritzon gunera arte.

Debatik Ondarroara ibilaldia gehiegi dutenentzat aukera dago autobusez Mutrikura  joan eta ibilaldia han  asteko, eta hauek ere, Galdona Mendira iritsiko dira, eta bi taldeak elkartuta eta eguraldia lagun,  leku paregabean egingo da hamaiketakoa.

Ondoren, txangoaren amaiera artekoa bi taldeak elkarrekin egingo dugu.

Saturraran atzean utzitakoan Ondarroa azalduko zaigu aurrez aurre, eta bertara iritsita, agian,  herrian bueltatxo bat emateko tartea izango dugu Batzokira bazkaltzera joan aurretik. Bazkaria:  30,00€

  1. Aukera:

Distantzia:  10 km inguru.

Igoera/jaitsiera metatuak 450 m inguru.

  • Aukera:

Distantzia: 5,2 km inguru

Igoera/jaitsiera metatuak: 250 m inguru

Izena ematea: Mendizabal kinkila-dendan maiatzaren 2tik  8ra Irteera: Goizeko 8:30ean Agoues-eneko biribil-gunetik


TRACK-a

MAIATZAK 5: KASEDA-GALIPENTZU-UXUE

GR-1 Ibilbide Luzeko Bidezidorra da. Ampuriasen (Gironan, Costa Brava erdian), Mediterraneo ertzean hasi eta Atlantiko ozeanoranzko norabidea hartzen du. Aurreneko 600 bat km GR-11 Pirinioetako bidezidorraren parean egiten ditu, eta ondoren, iparraldean, Done Jakueren bidearekin (GR-65) lehian doa aurrera. Los Arcosen (Nafarroa) gurutzatzen dira bi bideak eta handik Penintsularen beste ertzeraino jarraitzen du, Finisterreraino (Coruña).

Oraingo honetan ibilbidea (txangoa) Kasedan hasi, Galipentzutik igaro eta Uxuen amaituko dugu.

Kaseda (445 m)

Herria beheko aldetik gurutzatuta, bideak lurralde lau batetik egiten du aurrera, telefono lineatik hurbil, xake-taularen antzera markatuta dauden laborantzako lur artetik. Ibili 20 bat minutuan eta bidarte edo pista gurutze batera iritsiko gara. Han eskuinera egin eta Aragoi ibaira heldu arte jarraituko dugu. Ezkerrean utziko ditugu San Pedro mendilerroko(889 m) azken aldean nagusi diren Kaparretako Uharrizko harkaitzak,

Zubi erromanikoa (380 m)

Galipentzu Zaharra gure buru gainean zintzilik dugula, Aragoi ibaia igaroko dugu Erdi Aroko zubitik. Aldapa piko bat igota, erdi hutsik dagoen herri honen kale estu eta maldatsuetan ibiliko gara.

Galipentzu (543 m)

Galipentzu (543 m). Goi aldetik H-Mra, Uxuerako bidea hartuko dugu. Antzina mandabidea eta transhumantziako abelbidea zena, gaur egun pistek eta traktoreen gurpil-markek ia erabat ezabatua dago.

Bidegurutzea muino baten gainean. Jaitsiera luze batean, ezkerrean Sola eskorta utziko dugu eta beste hiru sakan igaroko ditugu: Capaburros, Aliaga eta Tutibero. 30 minututan aldapa luze batek muino gainera eramango gaitu, San Migelen baselizaren (XIII.m.) hondakinetatik gertura. Amaitzeko, Uxue (747m) herrira iristeko azken pausoak egitea gelditzen zaigu.

Distantzia: 18 km inguru

Igoera metatua: 750 m inguru

Jaitsiera metatua: 450 m inguru

Iraupena: 5 / 5:30  ordu inguru

Zailtasuna: Ez du aparteko zailtasunik.

Irteera: 7:30ean Agoues-eneko biribilgunetik

Track-a

IRURTZUN – ERGA – LATASA

Gaurko zeharkaldia Irurtzunen (472m) hasiko dugu, konkretuki Matxain jatetxearen alboko aparkalekuan. Behin martxan jarrita herriaren goiko aldera abiatuko gara, Plazaolako tren geltokia zegoen gunera, gaur egun bide gorri edo “via verde” batetan bihurtuta dago. Guk, bide hori hartuta “Balcon del buitre” deitzen den guneraino joan-etorria egingo dugu.  

Itzuli ostean,  gune honetatik irteten den bidexka harturik dena gorantz egingo dugu, hau da; iparraldera, eta herriko ur-biltegitik pasata, marra laranjak jarraituaz, harizti batetan sartuko gara, eta konplikaziorik gabe, “Pikuxarreko bidea” izena duen bideak bat egingo du Aizkorbetik datorren pistarekin eta, hemendik aurrera erromesen bidean bihurtuko da Trinitate ermitara joateko.

Basotik irtetean, sigi-saga batzuk egin beharko ditugu malda gainditzeko eta, berehala ikusiko ditugu baseliza eta aldamenean dagoen aterpea ere (1014m). Arnasari buelta emanik eguneko azken ahalegina eginez Erga (1088m) tontorrera igoko gara.  Oso ikuspegi ederra dago gain honetatik. Beriain eta Aralarko San Migelen tontorra berehala bereziko ditugu, giroa lagun.

Tontorretik atzera bidea eginez aterpera jaitsiko gara hamaiketakoa egitera eta behin tripa aseturik berehala hasiko gara beherako bidean, mendebaldeko isuri aldera jaisten, bidexka garbi eta nabarmen batetatik zehar, pagadi eder bat zeharkatuaz eta ia jaitsieraren amaieran autobideko trafikoaren zarata hasiko zaigu eta, baita ere Bi Ahizpen harkaitzak ikusiko ditugu.

Momentu batetan gure bidexkak iparraldera joko du eta Latasa herria (470m) ikusten hasiko gara. Azken metroak eginez berehala izango gara herriaren sarreran, Eraso erreka zubitxo berri batetik gurutzatuta zeharkaldiaren amaierara iritsiko gara.

Distantzia:  13 km inguru

Igoera / jaitsiera metatuak:  730 m inguru

Zailtasuna:  Ez du aparteko zailtasunik Irteera: Goizeko 7.30ean Agoues-eneko Biribil-gunetik

Erga Track-a

KOSTALERA OTIÑANOTIK

BERROTZA  Lizarraldeko  haran oso polita da eta, bere ertzetan kokatzen diren Azedo, Asarta, Kabrega, Mendatza, Iturriaga, Nazar, Mues, Piedramillera, Sorlada, Ubago eta  Otiñano herriak daude.

OTIÑANO, Kodes azpian dagoen Berrotzako azkeneko herrixka da, nahiz eta administratiboki lau kilometrotara dagoen Torralba del Río udalerriko kontzejua izan.

1456. urtera arte Berrotzako herria  izan zen. Garai horretan ez zen biztanlerik geratzen herrian eta Leonor printzesak, zorren bat kitatzeko, Otiñanoko lur guztiak, lau kilometrotara dagoen Torralba del Ríoko udalerriari eman zizkion, Otiñanon inoiz biztanleak egonik ere, hauek beti Torralbaren menpe egongo zirela onartuz.

Otiñanotik (690m) abiatuko gara eta, Kostalera bistan dugula, 2,5 kilometrotara dagoen NAZAR-era (740m)  iritsiko gara.

Hemen 1. AUKERA izan dezakegu (trackean gorriz). Eguraldi baldintza egokiak izanez gero eta talde txiki bat animatuko balitz, Kostalera gailurretik egin daiteke. Zailtasun piska bat duen sei kilometroko tartea da (behetik baino hiru kilometro gehiago). Leku batzuetan bide garbirik ez dago eta ezpel artean ibili behar da. Gainera, hiru edo lau tarte lau hanketan egin behar direnez, ez da gomendagarria talde handian egiteko.

Talde nagusia, Kostalera erpinaren azpiko maldatik artadian barrena doan pistatik jarraituz mendi-lerroaren ipar-mendebaldean dagoen mendatera (1156m) joango da, hau da;  Kanpezurako  bidegurutzera iritsiko da.

Hemendik  Kodesko mendikatea ikus daiteke eta, aurrerako bidean hiru kilometrotan ezkerretara  Nafarroako Berrotzako ikuspegi zabala goza daiteke eta, eskuinera Arabako Kanpezu aldeko lautada, Lokiz,…

Ondoren 2. AUKERA izan daiteke (trackean arrosaz): eguraldiaren eta orduaren arabera, Ioar (1417m) mendi tontorrera igotzeko aukera izango da (joan-etorria 2 kilometro inguru eta, 250m igoera/jaitsierak).

Hemen,  Kodesko Santutegirako bidea hasiko da. Harkaitz izugarri ederren artean, harri arteko malda behera pikoan bi kilometro eginaz iritsiko gara bertara (790m).

Eta amaitzeko, lau kilometro faltako dira Otiñano-ra iristeko.

Distantzia:  15 km inguru (aukerak aparte)

Igoera metatua:  900 m inguru (aukerak aparte)

Jaitsiera metatua:  900 m inguru (aukerak aparte)

Zailtasuna: Erraza 1. AUKERA ezik. Irteera: Goizeko 7:30ean Agoues-eneko Biribil-gunetik

KOSTALERA-ko TRACK-a

Jorge Garcia-Dihinx-en hitzaldia

Bazkide agurgarriok:
Gutako askori http://lameteoqueviene.blogspot.com/ bloga ezaguna egiten zaigu. Bertan Jorge García-Dihinx-ek astero astero Piriniotako eguraldiaren inguruan aritzen da. Baina Jorge ez da meteorologoa sendagilea baizik, zehazki elikaduran aditua.
Hurrengo asteazkenean, Martxoak 20ean, elikudarari buruz jardungo da Zarautzen . Hitzaldia Zarautz K.E. eta Pagoeta M.E.k antolatu dugu, elkarlanean.
Hauek dira hitzaldiaren inguruko jakin beharrekoak:
Eguna: Martxoak 20a, asteazkena.

Hizlaria: JORGE GARCÍA-DIHINX

Ordua: 19:00 (ordu terdi inguru iraungo du)

Lekua: Antonianoko aretoa

Izenburua: DIETA Y EJERCICIO. EL NUEVO MANEJO DE LA OBESIDAD

Doanekoa da
Proposamena gustokoa izango duzuelakoan,

Batzordea

ASTE SANTUA 2019: Cazorla

Apirilak 19: POYOS DE MESA (1601 m) .  Ibilaldia, irteera honetako motxena da, 18,5 Km inguru eta 750m-ko desnibela, Guadalquivir ibaiaren sorburu inguruko gailur ederra, goi partean zelai ederrak eta ikuspegi zabalak dituena. Ibilbide zirkularra da. Ibilbidea bidezidorretatik barna doa gehienbat eta paraje ezkutu eta basatiak zeharkatzen ditu. Arratsaldez ordubete inguruko ibilaldi txiki bat egiteko aukera egongo da Cascada Linarejos inguruan.

Apirilak 20:   GILILLO. Larunbata egun borobila izango dugu.   Ibilaldiak 22 Km inguru eta desnibela berriz 1230m ingurukoa.  Cazorla herritik abiatuta bertako gailurrik famatuena eta mendizerrako garaiena igoko dugu bere 1848 metroekin. Ibilbide zirkularra da eta, egingo ditugun hiru ibilaldietatik goi-mendi kutsu handiena duena ere bai.  

Apirilak 21:  RIO BOROSA, LAGUNA DE VALDEAZORES.  Borosa ibaiaren bailaratik gora joango gara Valdeazores-eko aintziraraino. Aintzirak,  haitzarteak, eta ur-jauziak, paraje ederra benetan.  Joan eta etorri bide berdinetik egingo dugu, ibilbidea luzea da baina erreza. Ibilaldiak 27Km inguru ditu eta 1170m-ko desnibelae

AURKEZPENA

EGITARAUA ETA BALDINTZAK

POYOS DE MESA

POYOS DE MESA TRACK-A

GILILLO

GILILLO TRACK-A

BOROSA – LAGUNA DE VALDEAZORES

BOROSA – LAGUNA DE VALDEAZORES TRACK-A